Càit a bheil iad a-nis?
Choinnich sinn ri cuid de na h-alumni againn gus faighinn a-mach...
An e alumni UHI a th’ annaibh?
Lauren Neill
Cuspair stuidearachd: BA (le Urram) ann an Conaltradh Lèirsinneach agus Dealbhadh
A-nis: Dealbhaiche Grafaigeach, Campbell Braybrooke Ltd
Tha mi an urra ri bhith a’ cruthachadh stuthan clò-bhuailte agus didseatach airson nan Duaisean Èifeachdas Lùtha agus a’ Chomainn Èifeachdas Lùtha.
Bho cheumnaich mi bho UHI ann an 2019, tha mo chùrsa-beatha air a bhith na thuras togarrach ann an dealbhadh. Tha mi air a bhith toilichte mo chuid obrach fhaicinn aig co-labhairtean nàiseanta agus tachartasan dhuaisean, agus tha cothrom air a bhith agam cuideachd co-obrachadh le Craigrossie Printing, rud a dh’fhosgail dorsan nach do shaoil mi a-riamh.
Is e bàrr mo chùrsa-beatha gu ruige seo a bhith a’ faicinn mo dhealbhaidhean a’ tighinn beò aig tachartasan mòra. A’ coimhead air adhart, tha mi airson pròiseactan nas àrd-amasaiche a ghabhail os làimh, fàs a thoirt air mo ghnothachas neo-eisimeileach, agus leantainn orm a’ cruthachadh obair dealbhaidh a bheir fìor bhuaidh.
Tro mo chuid ionnsachaidh aig UHI fhuair mi na sgilean agus a’ mhisneachd a bhith ag obair tarsainn ùrlaran clò-bhuailte agus didseatach, an dà chuid. Leis an àrainneachd thaiceil, na h-òraidichean brosnachail, agus na clasaichean beaga, chaidh agam air mo sgilean a leasachadh agus mo ghuth fhìn a lorg ann an dealbhadh.
Anndra MacLeòid
Cuspair stuidearachd: BA (le Urram) ann an Eòlas Diadhachd
A-nis: Urramach, Eaglais Shaor h-Alba
’S e Ministear Eaglais New City, Dùn Phàrlain, a th’ annam a-nis. Às dèidh dhomh ceumnachadh bho UHI ann an Eòlas Diadhachd ann an 2015, chaidh mi air adhart gu bhith ag ionnsachadh aig Sgoil-diadhaireachd Dhùn Èideann, far an do cheumnaich mi ann an 2017. Sa cheart bhliadhna, fhuair mi cead mar Mhinistear ann an Eaglais Shaor na h-Alba agus an dèidh sin chaidh m’ òirneadh nam Mhinistear Cuideachail aig Eaglais Shaor Bhaile Dhubhthaich agus Mhanachainn Rois. Anns an Dùbhlachd 2024, ghabh mi ri gairm gu Dùn Phàrlain, agus sa Ghiblean 2025, chaidh mo chur an dreuchd mar Mhinistear Eaglais New City.
’S e bàrr-phuing mo mhinistrealachd a bhith a’ faicinn fhir, bhoireannaich agus dhaoine òga a’ tighinn gu creideamh anns an Tighearna. A’ coimhead air adhart, tha mi an dòchas gun lean mi orm a’ pàirteachadh teachdaireachd Iosa Crìosd agus gum faigh mi togalach maireannach don choithional.
Le bhith ag ionnsachadh aig UHI fhuair mi bunait làidir ann an diadhachd agus taic bho shàr luchd-obrach. B’ e aon de na rudan a b’fheàrr mun chùrsa gun gabhadh ionnsachadh air astar à Steòrnabhagh, agus b’ urrainn dhomh cumail orm ag obair aig an aon àm ri mo chuid ionnsachaidh.
Harsh Rajendra Raval
Cuspair stuidearachd: BEng (le Urram) ann an Innleadaireachd Charbadan-adhair
A-nis: Àrd-mhanaidsear, Prògram Càradh Itealain, United Airlines
Tha mi a’ stiùireadh sgioba de phroifeiseantaich a tha a’ dealbhadh, a’ piseachadh agus a’ dearcnachadh phrògraman càradh itealain tarsainn iomadh cabhlach. Bidh an obair agam a’ cothlamadh eòlas teicnigeach le innealan stèidhichte air dàta gus èifeachdas, earbsachd agus gèilleadh a leasachadh.
Cheumnaich mi bho UHI ann an 2014. An ath bhliadhna, thill mi do na h-Innseachan airson inntearnas le Air India, is mi a’ dèanamh treisean mun cuairt ann an Dealanachd-itealain, Uidheam-cumhachd, agus Earbsachd. Ann an 2016, chaidh mi a-steach do Air India làn-ùine san roinn Dealanachd-itealain, agus ann an 2017 ghluais mi gu United Airlines mar Mhion-sgrùdaire Coileanadh Cabhlaich. Fhuair mi àrdachadh nam Àrd-innleadair ann an 2019, nam Mhanaidsear - Prògraman Càraidh ann an 2022, agus nam Àrd-mhanaidsear ann an 2025.
Is e bàrr-phuing mo chùrsa-beatha gu ruige seo an t-àrdachadh a fhuair mi nam Àrd-mhanaidsear aig United Airlines, a tha a’ nochdadh mar a dh’fhàs mi bho inntearnach gu ceannardas aig companaidh-adhair chruinneil. A’ coimhead air adhart, tha mi an dòchas gun lean mi orm a’ dèanamh adhartas ann an ceannardas itealanachd, is mi a’ cumadh ro-innleachdan càraidh fad-ùineach agus a’ meantoradh an ath ghinealaich de phroifeiseantaich.
Thug mo chùrsa aig UHI bunait theicnigeach làidir dhomh a bharrachd air gnàth-eòlas practaigeach. Leis an àrainneachd ionnsachaidh eadarnàiseanta chaidh an comas atharrachaidh agus na sgilean conaltraidh agam a neartachadh, agus thug na clasaichean beaga, taiceil buaidh mhòr air mo mhisneachd.
Robin Wallace
Cuspair stuidearachd: LDL ann an Stiùireadh agus Riaghladh Sheirbheisean Cùraim
A-nis: Ceannard Sheirbheisean Cùraim-chòmhnaidh is Cùraim Latha do Sheann Daoine, Com-pàirteachas Cùram Slàinte is Sòisealta Bhaile Ghlaschu
Mar Cheannard Cùraim-chòmhnaidh is Cùraim Latha do Sheann Daoine do Chomhairle Bhaile Ghlaschu, bidh mi a’ marasglachadh ro-innleachd, obrachaidhean, agus atharrachadh cultarach tarsainn sheirbheisean deatamach.
Às deidh dhomh ceumnachadh bho UHI, chaidh mi a-steach do charthannas nàiseanta airson dhaoine gun dachaigh mar Mhanaidsear Obrachaidhean is Gnothachais. Ann an 2016, fhuair mi àrdachadh nam Àrd-mhanaidsear Obrachaidhean agus thòisich mi air ceum maighstireachd aig Oilthigh Ghlaschu, a chrìochnaich mi ann an 2017. Sa cheart bhliadhna, thàinig mi gu bhith nam Leas-stiùiriche air Simon Community Scotland, an carthannas as motha san dùthaich airson dhaoine gun dachaigh, mus do ghluais mi a-steach don dreuchd làithreach agam. A bharrachd air an turas phroifeiseanta agam, bha dà chlach-mhìle nam bheatha phearsanta, is iad sin gun do rinn mi sàr phòsadh agus gu bheil mi a-nis nam athair.
Is iomadh bàrr-phuing a bh’ ann feadh mo chùrsa-obrach, ach is e aon a tha a’ seasamh a-mach gun robh mi air ceann stèidheachadh a’ chiad sgeama tabhairt atharrachail ann an Alba airson dhaoine a tha gun dachaigh agus air baigeireachd sràide. Is e mo mhiann fhathast a bhith mar an cèile, an t-athair, an co-obraiche agus an stiùiriche as fheàrr a ghabhas, agus mo luachan a chur an gnìomh gach latha.
B’ e mo chùrsa aig UHI a bu thoiseach don t-slighe seo. Chuidich e mi a bhith a’ daingneachadh a’ ghnàth-eòlais agam, a’ ceumnachadh a-steach do dhreuchdan àrd-cheannardais le misneachd, agus a’ cothromachadh obair is ionnsachadh leis an t-sùbailteachd agus an taic a bha e a’ tairgsinn.
