NATECLA 2025

Chaidh am pròiseact aig Guthan nan Eilean, “Multilingual Memories: Birmingham 1984”, a thaisbeanadh le taic bho ChIALL aig co-labhairt bhliadhnail NATECLA, a’ Chomann Nàiseanta airson Beurla agus Cànanan Coimhearsnachd Eile a Theagasg do Dh’inbhich, a chaidh a chumail aig Oilthigh Aston air an 27mh agus an 28mh Ògmhios.

Thar nam bliadhnaichean, tha NATECLA air a bhith ag argamaid gu cunbhalach airson aire iomchaidh a thoirt do na cànanan eile a thathas a’ cleachdadh san RA a bharrachd air Beurla. Le bhith a’ leantainn sgeulachdan beatha luchd-obrach Industrial Language Training mar aon eisimpleir, tha am bhidio aithriseach aig Guthan nan Eilean a’ neartachadh a’ phuing gu bheil iomadachd cànain a-nis air a stèidheachadh gu follaiseach, eadhon ann an Sasainn, agus gu bheil e riamh air a bhith ann gu nàdarra air feadh na RA.

Le còdan QR air an cur a-steach don phostair taisbeanaidh, a bharrachd air bileag airson gach aon de na 350 pasgan airson luchd-frithealaidh na co-labhairt, b’ urrainn  dhaibh fear sam bith de na 22 clàradh fhaicinn anns na 13 cànanan eadar-dhealaichte sa chruinneachadh, air na h-innealan aca fhèin agus aig an àm a b’ fhasa dhaibh. Le urrasair NATECLA, Mary Osmaston, cuideachd a’ ruith bùth-obrach air cleachdadh chànanan eile ann an seòmar-chlas na Beurla, b’ e cothrom air leth iomchaidh a bh’ ann cuid de na cànanan sin a thaisbeanadh tro na clàraidhean aig Guthan nan Eilean.